5 Sundarikal (Malayalam)

അന്‍വര്‍ റഷീദ്, സമീര്‍ താഹിര്‍ആഷിക് അബു,അമല്‍ നീരദ്,ഷൈജു ഖാലിദ്  എന്നീ അഞ്ച് സംവിധായകര്‍ ചേര്‍ന്ന അഞ്ച് ചെറു ചിത്രങ്ങളുടെ സംഗ്രഹമാണ് "അഞ്ച് സുന്ദരികള്‍".

 

         ഏറ്റവും പുതിയ റിപ്പോര്‍ട്ടുകള്‍ അനുസരിച്ച് സിനിമ സൂപ്പര്‍ ഹിറ്റിലേക്ക് എന്നാണ് പറയപ്പെടുന്നത്.വിവിധ സ്ഥലങ്ങളില്‍ നിന്നുള്ള റിപ്പോര്‍ടുകള്‍ കാണിക്കുന്നത് ദുല്‍ക്കര്‍ സല്‍മാനെ നായകനാക്കി അമല്‍ നീരദ് സംവിധാനം ചെയ്ത കുള്ളന്റെ ഭാര്യ പ്രേക്ഷകരുടെ മനം കവര്‍ന്നു എന്നാണ്. എല്ലായിടത്തു നിന്നും ഈ സിനിമക്ക് നല്ല പ്രതികരണമാണ് കിട്ടിയത്. ഷൈജു ഖാലിദ് സംവിധാനം ചെയ്ത പുതുമുഖ ചിത്രം "സേതുലക്ഷ്മി" മികച്ച പ്രതികരണങ്ങളുമായി തൊട്ടു പുറകെ ഉണ്ട്. ജയസൂര്യ,ടിനി ടോം,റിമി ടോമി എന്നിവരെ പ്രധാന താരങ്ങളാക്കി ആഷിക് അബു സംവിധാനം ചെയ്ത "ഗൗരി"  മാത്രം ചെറിയ രീതിയില്‍ പാളിപ്പോയതായും വിവിധ സ്ഥലങ്ങളില്‍ നിന്നുള്ള റിവ്യൂകളില്‍ സൂചിപ്പിക്കുന്നു. പതിവുപോലെ ഗോപി സുന്ദറിന്റെ ബാക്ക്ഗ്രൗണ്ട് സ്കോര്‍ പ്രേക്ഷക മനം കവര്ന്നതായി പറയുന്നു.


റെയ്ട്ടിംഗ്: 7.0/10

Left Right Left (Malayalam)

        ഏറെ കാലം കൂടി കണ്ട മികച്ച ഒരു രാഷ്ട്രീയ സിനിമ ആയി ലെഫ്റ്റ് റൈറ്റ് ലെഫ്റ്റിനെ  വിശേഷിപ്പിക്കാം. ഒരുപാട് കാലം കണ്ടു മടുത്ത രാഷ്ട്രീയ കാഴ്ചകള്‍ വീണ്ടും വീണ്ടും അവതരിപ്പിക്കുന്നതിനാല്‍ പാളിപ്പോകുന്ന രാഷ്ട്രീയ സിനിമകള്‍ക്കിടെ  മുരളി ഗോപിയുടെ  വ്യത്യസ്ഥമായ തിരക്കഥയാല്‍  വേറിട്ട്‌ നില്‍ക്കുകയാണ് ഈ സിനിമ. കൂടുതല്‍ സമയവും സംഭാഷണങ്ങളിലൂടെ ആണ് കടന്നു പോകുന്നതെങ്കിലും കാഴ്ച്ചക്കാരെ  സീറ്റില്‍ പിടിച്ചിരുത്തുന്ന ത്രില്ലിംഗ് ആണ് എടുത്തു പറയേണ്ടത്.മൂന്നു മണിക്കൂര്‍ ദൈര്‍ഖ്യം ഉള്ള സിനിമയില്‍ ഒരുമിനുട്ട് പോലും മടുപ്പുളവാക്കുന്നില്ല എന്നത് മുരളി ഗോപിയുടെ ക്രെഡിറ്റ്‌ തന്നെയാണ്.

          ഈ അടുത്ത കാലത്ത് എന്ന സിനിമക്ക് ശേഷം സംവിധായകന്‍ അരുണ്‍കുമാര്‍  അരവിന്ദും മുരളി ഗോപിയും ഒന്നിക്കുന്ന ആദ്യ ചിത്രമാണ് ലെഫ്റ്റ് റൈറ്റ് ലെഫ്റ്റ്.പ്രകടന മികവില്‍ എന്നത്തേയും പോലെ ഇന്ദ്രജിത്ത് തന്‍റെ കഥാപാത്രത്തോട് നൂറു ശതമാനവും നീതി പുലര്‍ത്തി.ചെറുതെങ്കിലും തന്‍റെ കഥാപാത്രത്തെ മനോഹരമാക്കുന്നതില്‍ മുരളി ഗോപിയും വിജയിച്ചു. കൈതേരി സഹദേവന്‍ എന്ന കഥാപാത്രത്തെ സിനിമ കണ്ടിറങ്ങിയവര്‍ ആരും മറക്കില്ലെന്നുറപ്പ്. അരുണ്‍കുമാര്‍ അരവിന്ദ് തന്നെയാണ് ഇതിന്റെ എഡിറ്റിങ്ങും ചെയ്തിരിക്കുന്നത്. അദ്ദേഹത്തിന്റെ ചടുലമായ എഡിറ്റിങ്ങും കഥാപാത്രങ്ങളുടെ മികച്ച പ്രകടനങ്ങളും ഗോപി സുന്ദറിന്റെ ബാക്ക്ഗ്രൗണ്ട് സ്കോറും  ചേര്‍ന്ന് സിനിമയുടെ അവസാന ഭാഗങ്ങളില്‍ ഒരുപാട് കയ്യടി വാങ്ങുന്നുണ്ട്.

       ഇല്ലാ വചനങ്ങള്‍ ചേര്‍ത്ത് കേരള രാഷ്ട്രീയത്തെ താഴ്ത്തി കെട്ടിയ പല സിനിമകളും ഒരു വിലക്കുമില്ലാതെ ഓടിയ കേരളത്തില്‍,കക്ഷിരാഷ്ട്രീയമില്ലാതെ സ്വതന്ത്ര വിമര്‍ശനം നടത്തുന്ന ഉയര്‍ന്ന നിലവാരമുള്ള ഈ ഒരു സിനിമയെ വിലക്കാന്‍ നടക്കുന്ന ശ്രമങ്ങള്‍ തീര്‍ത്തും സങ്കടകരമാണ്. ഒരു യുഗത്തിനു ശേഷം വീണ്ടും ഉയര്‍ച്ചയിലേക്ക് കുതിക്കുന്ന മലയാള സിനിമാ ശാഖയെ താഴ്ത്തിക്കെട്ടാന്‍ മാത്രമേ അത് ഉപകരിക്കൂ.

റെയ്റ്റിംഗ്:7.5/10

ABCD (Malayalam)

       ബ്ലോഗിന്റെ ആദ്യ റിവ്യൂ തന്നെ ഒരു മികച്ച എന്റര്‍ട്ടെയ്നര്‍നു കൊടുക്കാന്‍ കഴിഞ്ഞ തൃപ്തിയില്‍ ആണ് ഈ റിവ്യൂ എഴുതുന്നത്. റോള്‍ സെലെക്ഷനില്‍ ദുല്‍ക്കറും ഹിറ്റ്‌ മെയ്ക്കിങ്ങില്‍ ബെസ്റ്റ് ആക്ടരിന്റെ തുടര്‍ച്ച എന്നോണം മാര്‍ട്ടിന്‍ പ്രക്കാട്ടും തുടര്‍ച്ച നില നിര്‍ത്തിയപ്പോള്‍ മികച്ച ഒരു എന്റര്‍ട്ടെയ്നര്‍ മലയാളത്തിനു കിട്ടി. ന്യു ജെനെറേഷന്‍ അശ്ലീല കോമെടികള്‍ ഒന്നും കുത്തി നിറക്കാതെ എല്ലാ പ്രായക്കാരെയും ഒരുപോലെ ചിരിപ്പിക്കാന്‍ കഴിയുന്നിടത്താണ് പ്രക്കാട്ടും സംഘവും വിജയിക്കുന്നത്.

     ഒരു ബുദ്ധി ജീവി സിനിമ പ്രതീക്ഷിച്ചല്ല ആരും ഈ സിനിമയെ വരവേല്ക്കെണ്ടത്. ബുദ്ധി എല്ലാം വീട്ടില്‍ വെച്ച് ചിരിക്കാന്‍ മാത്രമായി തിയേറ്ററില്‍ കയറുക.തീര്‍ച്ചയായും നിങ്ങള്‍ ആസ്വദിക്കും ഓരോ സീനും. എന്നിരുന്നാലും കേരളത്തിലെ പല സാമൂഹിക-രാഷ്ട്രീയ  വ്യവസ്ഥിതികളേയും ന്യൂ യോര്‍ക്ക്‌ നഗരവുമായി രസകരമായി താരതമ്യപ്പെടുത്തി വിമര്‍ശന വിധേയമാക്കുന്നുണ്ട്. അതുപോലെ തന്നെ "കേരളമെന്ന ഏറ്റവും മികച്ച യൂണിവേര്‍‌സിറ്റിയില്‍ " എന്ന് പറഞ്ഞു പ്രകീര്തിക്കുന്നുമുണ്ട്.

          പ്രകടന മികവില്‍ ദുല്‍ക്കര്‍ മുന്‍പന്തിയില്‍ തന്നെ നില്‍ക്കുന്നു.മോശം എന്ന് പറയാന്‍ പ്രത്യേകിച്ച് ആരും തന്നെ ഉണ്ടായിരുന്നില്ല.മികച്ച കാസ്റ്റിംഗ് ഈ സിനിമയുടെ മറ്റൊരു പ്രത്യേകതയാണ്. ദുല്‍ക്കറിന്‍റെ വലം കൈ ആയ കോര എന്ന കഥാപാത്രം ഒരുപാട് നര്‍മം വിളമ്പുന്നു.അലസനും ധൂര്‍ത്തനും ആയ മകനെ  ജീവിതം പഠിപ്പിക്കാനായി പിതാവ് ഐസക് (ലാലു അലെക്സ്) കേരളത്തിലേക്ക് അയക്കുന്നത് മുതലാണ്‌ സിനിമ തുടങ്ങുന്നത്. അവരുടെ കേരള ജീവിതം ആണ് സിനിമക്ക് ആധാരം.

          ജോമോന്‍ ടി ജോണിന്‍റെ ക്യാമറ ഓരോ ഫ്രെയ്മുകളെയും മനോഹരമാക്കുന്നു. ചില ട്രാന്‍സിഷന്‍സ്ഥലങ്ങളില്‍ മലയാളത്തില്‍ അധികം  ഉപയോഗിച്ച് കണ്ടിട്ടില്ലാത്ത  ടൈം ലാപ്സ്ഫുട്ടെയ്ജുകള്‍ പരീക്ഷണാര്‍ത്ഥം ഉപയോഗിക്കുന്നുണ്ട് ഇതില്‍. ഒപ്പം ചെണ്ട,കുഴല്‍ പോലുള്ള നാടന്‍ വാദ്യങ്ങള്‍ മറ്റു ഇന്‍സ്ട്രമെന്റ്സുമായി ഫ്യൂസ് ചെയ്യിച്ച്  ഗോപി സുന്ദര്‍ ബാക്ക്ഗ്രൗണ്ട്  മ്യൂസിക്കിലും പുതുമ കണ്ടെത്തിയിരിക്കുന്നു.

റെയ്ട്ടിംഗ്: 6.5/10